Biktima nagsumbong.. CR ng babae nabuking na may camera

Kalaboso ang isang maintenance nang madiskubre ang camera na kanyang inilagay sa loob ng banyo ng mga babae sa isang kumpanya sa Valenzuela City.

Nahaharap sa kasong paglabag sa RA 9995 “Anti-Photo and Video Voyeurism Act of 2009” si Ereberto Narito, Jr., 29, ng Joyce St., Karuhatan. Alas-10:00 ng umaga, pumasok sa banyo ng kanilang pinagtatrabahuhan sa Superior Stock Farm Feedmills sa Bgy. Maysan, ang 23-anyos na secretary na itinago sa pangalang ‘Lorna’ nang mapansin nito ang light bulb ng camera.

Lumabas ang biktima at sinabi sa kanyang katrabaho na si ‘Mary Ann’ ang natuklasan kaya pinuntahan ito at tinanggal ang bulb kung saan nakumpirma na ang naturang bulb ay operated din sa CCTV.

Sa CCTV footage ng kanilang kumpanya ay nakita ang suspek na pumasok sa banyo ng mga babae noong February 6, 12:37 ng tanghali, na may bitbit na screw driver at napansin nila ang isang bagay sa loob ng kanyang bulsa.

Humingi ng tulong ang biktima sa security guard ng kanilang kumpanya na nagresulta sa pagkakaaresto sa suspek at narekober ang CCTV light bulb at cellphone ni Narito.