LRT-2 balik sa normal na operasyon sa Hunyo

Asahan nang maibabalik sa katapusan ng Hunyo ng kasalukuyang taon ang normal na operasyon ng Light Rail Transit-2 (LRT-2).

Ayon sa Department of Transportation (DOTr), matatapos na ang pagkukumpuni ng nasirang power rectifier na nasunog kamakailan at naging dahilan upang hindi gumana ang biyahe sa mga istasyon mula Santolan hanggang Anonas.

Mas maaga umano ang target na petsa kumpara sa naunang inianunsiyo na aabutin ng siyam na buwan ang pagsasara ng Santolan-Anonas Stations.

Inihayag pa ng DOTr na nakabili na ang gobyerno ng kinakailangang equipment para maiayos ang nasirang linya at nangangailangan ng sapat na panahon upang tapusin ang pagkukumpuni.

Sa ngayon, nagsisimula na ang operasyon ng alas-5:00 ng madaling-araw mula Cubao Station, Quezon City hanggang C.M. Recto Avenue sa Maynila at pabalik.