3 taong kulong at P150K multa sa nag-xerox ng libro para ibenta

Dr. Persida V. Rueda-Acosta / Magtanong Kay Attorney

Dear Chief Acosta, Bumili ng libro ang classmate ko sa puwesto na malapit sa school namin dahil mas mura ito kumpara sa libro na nabibili sa loob ng school. Nalaman namin na photocopy lamang pala ito sa orihinal na libro o ‘yung tinatawag nilang book-a-like. Mayroon bang nilabag na batas ang nagbenta ng ganitong uri ng libro? - Brix

Dear Brix, Ang batas na sumasaklaw sa iyong sitwasyon ay ang Sections 172 (a) at 178-178.1 ng Intellectual Property Code of the Philippines kung saan nakasaad ang mga sumusunod:

“Section 172. Literary and Artistic Works. - 172.1. Literary and artistic works, hereinafter referred to as “works”, are original intellectual creations in the literary and artistic domain protected from the moment of their creation and shall include in particular:

(a) Books, pamphlets, articles and other writings; Section 178. Rules on Copyright Ownership. - Copyright ownership shall be governed by the following rules:

178.1 Subject to the provisions of this section, in the case of original literary and artistic works, copyright shall belong to the author of the work;”

Dagdag pa rito, nakalagay sa nabanggit na batas ang mga parusa sa sinumang tao na mangopya sa gawa ng may-akda. Ito ay ang mga sumusunod:

“Section 217. Criminal Penalties. - 217.1. Any person infringing any right secured by provisions of Part IV of this Act or aiding or abetting such infringement shall be guilty of a crime punishable by: (a) Imprisonment of one (1) year to three (3) years plus a fine ranging from fifty thousand pesos (P50,000) to one hundred fifty thousand pesos (P150,000) for the first offense.

(b) x x x.

(c) x x x.

(d) In all cases, subsidiary imprisonment in cases of insolvency.” Malinaw sa mga nabanggit na maituturing na ang paggawa ng libro ng may-akda ay literary work na pinoproteksiyunan ng ating batas laban sa mga nais mangopya at pagkakitaan ito nang walang kaukulang permiso o pahintulot.

Ang karapatan at pag-aari ng literary work na ito ay nasa taong gumawa o may-akda. Sa inyong sitwasyon, ang taong nangongopya ng libro at ang pagbenta nito upang pagkakitaan ay maaaring maparusahan ng pagkakulong o multa depende sa diskresyon ng hukuman.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa isang abogado.