79 yrs. old patay sa sunog

Isang 79-anyos na lola ang nasawi nang masunog ang 14 na kabahayan kung saan 20 pamilya ang nawalan ng tirahan kahapon ng madaling-araw sa Pasay City.

Kinilala ni Pasay City Fire Marshal Supt. Edgar Tanawan, ang biktima na si Corazon Gamboa, 79, ng Bgy. 79, Zone 10 makaraang hindi makababa hanggang sa ma-suffocate ito sa nangyaring sunog.

Alas-12:45 ng madaling-araw nang magsimula ang sunog sa isa sa mga bahay sa lugar kung saan agad kumalat sa mga katabi pang kabahayan.

Umabot sa tatlong alarma ang sunog bago idineklarang under control alas-2:45 ng madaling-araw at tuluyang naapula alas-3:40 ng madaling-araw.

Sa mopping operation, natagpuan ang bangkay ng biktimang si Gamboa sa ikaapat na palapag ng tinitirhang bahay. Ayon sa mga residente, halos hindi na umano makalakad ang matanda dahil sa iniinda nitong sugat sa paa.