Malonzo at Tungcab, mga una sa 2020 D-League Draft

May kabuuang 137 mga aspirants ang nagdeklara ng kanilang paglahok sa darating na 2020 PBA D-League Draft.

Nangunguna sa listahan ang Fil-Am high-flyer ng De La Salle University na si Jamie Malonzo at Gilas pool member at University of the Philippines standout Jaydee Tungcab sa list ng mga lalahok sa Draft sa darating na Lunes sa tanggapan ng PBA sa Libis, Quezon City.

Ang 6-foot-6 at 23-anyos na si Malonzo ay nakabilang sa nakaraang UAAP Season 82 Mythical Team. Isa naman ang 22 anyos at 6-foot-3 guard na si Tungcab sa napili na mapasama sa Gilas cadets ng Samahang Basketbol ng Pilipinas (SBP).

Sa ika-apat na sunod na taon, ang AMA Online Education ang may hawak ng karapatan para sa top pick. Ang iba pang matunog na pangalan sa Draft pool ay sina dating Batang Gilas standout Jollo Go, ex-UAAP Juniors MVP Jerie Pingoy, Cebuano standouts Darrell Menina at Jaybie Mantilla, dating CEU scorer Judel Fuentes at UE forward John Apacible.

Bukod naman kay Malonzo, 16 pang Fil-foreign players ang nagpatala kabilang sina dating La Salle shooter Joshua Torralba, at mga UP standouts James Spencer, David Murrell, at JJ Espanola.