Procurement power, alisin sa PNP — P-Digong

Inalis na ni Pangulong Rodrigo Duterte ang procurement power ng Philippine National Police (PNP) makaraang magalit dahil ‘overpriced’ ang radar speed guns project.

Ayon sa Pangulo, nasa P10,000 lamang per unit ang radar speed gun sa Davao City ngunit, ang ipinanukalang pondo ng PNP sa kada piraso nito ay nagkakahalagang P950,000.

“Eh, saka itong pulis isa rin ‘yan. I removed the power of the PNP to procure equipment kasi ‘yung speed gun in Davao costs us about 10,000,” ani Duterte sa kanyang talumpati sa Philippine Marine Corps sa Fort Bonifacio sa Taguig City.

Dahil dito, ipinaubaya na ni Duterte kay Interior Secretary Eduardo Año ang procurement sa ngalan ng PNP.

Matatandaang, inatasan din ng Chief Executive si Año na pamunuan ang Pambansang Pulisya habang wala pang naitatalagang bagong PNP chief.

Kaugnay nito, binalaan din ang mga ahensiya ng gobyerno na huwag nang gumawa ng katiwalian sa paggamit ng pondo ng gobyerno.

Ikinukonsidera umano ni Duterte na buhayin ang Bureau of Supply na nasa ilalim ng Department of General Services na humahawak sa procurement noong panahon ni dating Pangulong Ferdinand Marcos at dati na ring pinamunuan ng kanyang ama.