Nagho-hoard ng face mask, pasukin! — P-Duterte

Nagbanta si Pangulong Rodrigo Duterte na ipasasalakay ang mga bodega ng mga negosyanteng masasangkot sa hoarding ng face mask sa bansa.

Kasunod ito ng napaulat na nagkakaubusan na ng face mask sa merkado dahil sa pag-aalburoto ng Bulkang Taal.

“Mura na man ‘yan, bakit…? Do not hoard it. ‘Pag itinago ninyo then I will be forced to order na pasukin ka,” giit ng Pangulo.

Magpapatupad din ng price-cap si Duterte sa mga face mask kasabay ng napabalitang pagtaas ng presyo nito dahil sa tumataas na demand na bunsod ng pagbuga ng abo ng Bulkang Taal.

“I am not surprise. Kasi itong mga negosyante if the demand is high then magkakaroon tayo ng medyo magkulang, then the prices go up. Or the worst thing that they can do if they have enough supplies and yet they are selling it at prohibitive prices already,” ani Duterte.

Ayon sa Pangulo, kakausapin niya si Health Secretary Francisco Duque III kaugnay sa pagtatakda ng price limit sa face masks, partikular na ang N95 masks.

“So, I’m setting the limit. I’d like to talk to the Public Health secretary tomorrow. There are things which I would like to bring to the attention of the Filipino people, especially ‘yung rape ng mga bata,” sabi ni Duterte.

Kaugnay nito, inatasan din ang mga militar at pulis na mamigay ng libreng protective masks sa publiko na walang kakayahang bumili. Nauna namang nagbabala si Manila Mayor Isko Moreno na pagpapaliwanagin niya ang mga kumpanya na nagtaas ng presyo ng face masks, gayung mas kailangan ito ngayon ng publiko.