Tatanggi sa isinosoling palpak na produkto.. P1 milyon multa sa online seller

Nagbabala ang Department of Trade and Industry (DTI) sa mga online sellers na tatangging tanggapin ang isinasauling depektibong produkto na binili sa kanila ng mga consumers.

Ayon kay DTI Secretary Ramon Lopez, may parusang multa na P100,000 hanggang P1,000,000 sa sinumang mapatutunayang tumatanggi sa mga ibinentang depektibong items na isinasauli ng mga consumers. Hinimok ng kalihim ang mga consumers na ireklamo sa Consumers Protection Division ng DTI ang mga abusadong nagtitinda online o mismong sa mga establisimyento.

Nag-ugat ang babala ng kagawaran kasunod ng libong mga consumers na bumibili online na nakatatanggap ng depektibong mga items na kanilang in-order online.