Kesa sa mga titser.. Sa dobleng sahod, pulis at sundalo dinepensahan

Muling dinepensahan ni Pangulong Rodrigo Duterte ang dobleng-sahod ng mga pulis at sundalo.

Sa 60th founding anniversary ng Cor Jesu College sa Digos City, sinabi ng Pangulo na marami siyang natatanggap na reklamo kaugnay nito.

“I’ve been hearing a lot of complaints bakit ‘yung sa mga pulis doblado at bakit sa maestra hindi pa? This country is a troubled land. I need soldiers and policemen, who are not afraid to die,” wika ng pangulo.

Aniya, buhay ang itinataya ng mga sundalo at pulis kaya marapat lamang ang good compensation sa kanila.

Giit ni Duterte, ang sundalo ang maaasahan sa tuwing may kalamidad na hindi kaya ng mga sibilyan.

Samantala, wala namang binanggit ang Punong Ehekutibo kung kailan makatatanggap ng umento sa suweldo ang mga guro na ipinangako niya ngayong taong ito.