Parak binentahan.. Ginang, huli sa P178-K shabu

Kulong ang isang ginang na tulak umano ng ilegal na droga matapos makumpiskahan ng P178,000 halaga ng shabu makaraang madamba sa buy-bust operation sa Navotas City, kahapon ng umaga.

Kinilala ni Navotas Police Chief P/Col. Rolando Balasabas ang naarestong suspek na si Annaliza Prada, 38, ng Malabon City.

Alas-11:30 ng umaga nang isagawa ng mga operatiba ng Station Drug Enforcement Unit (SDEU) sa pangunguna ni PLt. Charlie SJ Bontigao ang buy-bust operation kontra sa suspek sa Market 3, Bgy. NBBN, Navotas sa koordinasyon sa PDEA makaraan ang surveillance operation.

Sinunggaban ang suspek ng mga operatiba matapos tanggapin ang P300 marked money mula sa pulis na umaktong poseur-buyer kapalit ng sachet ng shabu.

Ani SDEU investigator PCpl Catherine Buella, nakumpiska sa suspek nang kapkapan ang buy-bust money, coin purse na naglalaman ng 43 sachets ng shabu na tumitimbang ng humigit- kumulang sa 26.6 gramo na tinatayang nasa P178,160 standard drug price at P400 bill.