Dahil sa pananaksak.. ‘Richard Gomez’, tiklo

Sa kulungan ang bagsak ng isang estudyanteng kapangalan ng aktor at Ormoc City Mayor na si Richard Gomez matapos saksakin ang nakaalitan sa isang inuman sa Pasig City.

Ang suspek na si Richard Gomez y Mulano, 25, ay nahaharap sa kasong frustrated homicide matapos umanong saksakin si Aldrin Collantes, 26, sa Villa Lamok, Bgy. Sagad.

Sa ulat ng Pasig City Police, alas-11:50 noong Martes ng gabi, Disyembre 17, nang maganap ang insidente.

Bago umano ang pananaksak ay masayang nag-iinuman ang biktima at kanyang mga kaibigan nang magkaroon ito nang pakikipagtalo sa suspek.

Sa kasagsagan ng argumento ay dumampot umano ng bote ng alak ang suspek at binasag ito saka ginamit na pansaksak sa biktima.

Agad namang naisugod sa ospital ang biktima habang ang suspek ay naaresto ng mga rumespondeng tauhan ng Bgy. Sagad Security Force at itinurnover sa pulisya.