Kasama ang mga drug lords.. P-Digong, papatayin ng NPA

Tiniyak ng Presidential Security Group na ligtas si Pangulong Rodrigo Duterte matapos mapasama sa hitlist ng New People’s Army.

“Definitely, kasi ito naman talaga ang trabaho ng PSG. So, we’ll do everything we can to secure the President,” ani Brig. General Jose Eriel Niembra, PSG Commander sa press briefing ng Malacañang.

Ginawa ni Niembra ang pagtiyak kasunod ng pagbubunyag ni National Security Adviser Hermogenes Esperon na kasama siya at ang Pangulo sa hitlist ng komunistang grupo.

“In fact, we always say, the mission of the PSG is to see to it that we have a living president day-by-day,” sabi ni Niembra.

Ayon pa kay Niembra, hindi lamang ang Pangulo kundi kasama rin sa nasabing listahan ang mga drug lords at sindikatong grupo.

“We expect that the President is number one in their list (but) rest assured, we’re doing something to protect the President,” giit ni Niembra.

Sa kabila nito, seryosong ikinokonsidera ng PSG ang pagkakasama sa listahan ng Punong Ehekutibo dahil hindi ito isang biro.

Gayunman, hindi na rin umano bago para sa kanilang hanay na makasama sa hitlist ang Pangulo lalo’t nalalapit na ang anibersaryo ng Communist Party of the Philippines (CPP) sa December 26.

Araw-araw aniya kada taon, nakatatanggap sila ng impormasyon na may banta sa seguridad ng Pangulo.

Ayon kay Niembra, pinapayuhan nila si P-Duterte na mag-ingat pero, hindi aniya ito sumusunod dahil batid naman niya ang kanyang mga limitasyon.

Kaugnay nito, plano umano ng Pangulo na magmotor at umikot sa Metro Manila.“Ito ang passion niya kasi. Ito ang hilig niya. Ang sabi nga niya, he will live and die with a motorcycle kasi sabi niya mas mabuti pang mamatay siyang nakamotor kaysa mamatay siyang nakahiga.

Ganoon kapursigido po ang ating presidente”. Inamin din ni Niembra na matapos ang pagsemplang ng Pangulo, nagmomotor na lamang ito sa M’cañang Complex.