6 na sports, regular nang member ng POC

Anim na bagong miyembro ng Philippine Olympic Committee (POC) ang inaprubahan ang membership status upang pormal na maging parte ng Local Olympic body.

Iniabot mismo ni POC president Abraham “Bambol” Tolentino ang mga certificates na nagpapatunay ng pagiging miyembro ng mga sports na Modern Pentathlon, Surfing, Bridge, Kurash, Jiujitsu at Sambo sa ginanap na general assembly noong Martes ng umaga sa Conrad Hotel sa Pasay City.

Makakasama ng anim na bagong miyembro ang 43 na national sports association (NSAs) bilang regular member’s ng national Olympic body kung saan mabibigyan ang mga ito ng pagkakataon na bumoto sa susunod na POC election sa 2020.

“We’re very happy that we’ve finally recognized and given a certificate by the POC, by means of our president Bambol,” wika ni Philippine Kurash Sports Federation Inc. (PKSFI) chief Roland Llamas, kung saan nakakuha ang kanilang koponan ng 1 gold, 2 silver at 4 na bronze sa nakalipas na 30th SEAG na ginanap sa San Fernando, Pampanga.

“Tuloy-tuloy na itong magandang samahan natin and mas lalo pa naming pagbubutihan para mas lalong umangat ang kalidad ng sport natin sa buong mundo,” dagdag ni Llamas, na dati ring multi-medalled national team member at Head coach ng Philippine Judo team.

“Our team is always ready for any international competitions. Na-proved na naman natin na kaya nating mag-medal sa Worlds having 2 bronze medals courtesy of Sydney Sy,” pahayag ni Pilipinas Sambo Federation Inc. secretary-general Paolo Tancontian, na nakapagbulsa ng 2 gold, 1 silver at 3 bronze medals.

Nagpasikat naman ng husto ang sports na Jiujitsu sa nakolektang limang gold medals mula kina world champions Meggie Ochoa at Annie Ramirez, kasama sina Carlo Peña, Dean Michael Roxas at Adrian Rodolfo Erwin Guggenheim.

Mayroon ding naiuwing 3 pilak at 3 tansong medalya ang mga ito. “Mas pagbubutihan pa po naming mabuti iyong paglalaro namin internationally and may mga goals pa po kaming tinatarget,” wika ni 2019 Abu Dhabi champion Ramirez.

Nakalangoy din ng 2 gold medals, 2 silver at 3 tanso ang surfing, habang ang Modern Pentathlon na pinamumunuan ni Mayor Richard Gomez ay may 2 gold, 1 silver at 2 bronze.