Kahit bawiin ang Martial Law — AFP.. Marawi siege, hindi na mauulit

Nakatitiyak ang Armed Forces of the Philippines Western Mindanao Command (WestMinCom) na hindi na mauulit ang limang buwang Marawi City Siege sakaling bawiin ang Martial Law sa Mindanao.

Binigyang-diin ito ni AFP-WestMinCom Commander Lieutenant General Cirilito Sobejana sa harap ng nalalapit na pagtatapos ng Batas-Militar sa rehiyon sa Disyembre 31.

Paliwanag ni Sobejana, maliit na ang puwersa ng mga teroristang grupo sa bansa at wala nang kakayahan ang mga ito na makapaglunsad ng malakihang pag-atake.

Noong Mayo 2017 nang maglunsad ng pag-atake at pagkubkob sa Marawi City ang grupong Maute-ISIS na tumagal hanggang Oktubre.

Iginiit pa ni Sobejana na kahit wala ang Martial Law, may mga magagamit pang bala ang militar tulad ng Executive Order 70 na makatutulong sa kanilang pagsisikap na tapusin ang problema sa terorismo.

Ani Sobejana, may walong dayuhang terorista ang kumpirmadong nasa Pilipinas habang 60 pa ang bineberipika ang presensiya sa bansa.