Gins, pagod pa sa SEAG, Pier, umusad sa Game 1

Laro ngayon: (Araneta Coliseum) 6:30 p.m. - TNT KaTropa vs Meralco

Pumabor ang bola sa NorthPort Batang Pier kaya nakuha nila ang 124-90 panalo laban sa Barangay Ginebra Gin Kings sa Game 1 ng PBA Governors’ Cup best-of-five semifinals kagabi sa Araneta Coliseum.

Nangalabaw si Batang Pier import Michael Qualls ng 38 pounts at 15 rebounds upang ilista ang 1-0 serye at lumapit sa pagsampa sa championship round.

Nag-ambag din sina Garvo Lanete at Christian Standhardinger ng tig 24 at 16 markers ayon sa pagkakasunod para sa Batang Pier.

Ipinaramdam ng Batang Pier ang kanilang lakas sa second quarter, kinarga nila ang 31-17 bentahe para hawakan ang 12-lead, 51-39 sa halftime.

Nakaungos ang Gin Kings sa first period, 22-20 pero nakabitaw sila sa second dahil sa mainit na opensa ni Qualls.

Nagpatuloy ang maangas na laro ng NorthPort sa third canto kaya nanatili sila sa unahan, 78-68 papasok ng fourth quarter.

Lalong ginanahan ang Batang Pier sa payoff period kaya naman umalagwa ang kanilang lamang at makuha ang madaling panalo.

Samantala, pareho ang nasa kukote ng Meralco Bolts at TNT KaTRopa, nais nilang manalo agad sa Game 1 ng kanilang best-of-five semifinals series.

“Game 1 is a must-win game,” saad ni TNT head coach Bong Ravena. “We have to come out really strong for we are the underdogs, not them.”

Medyo matagal na napahinga ang Bolts kaya nababahala si coach Norman Black.

“The main concern is coming off the long layoff and how it will affect our execution,” pag-amin ni Black.

Pero hinayag din ni Black na nasa condition ang kanyang mga bataan.

“We are healthy going into the series,” wika ni Black. “It’s important that we get into a good rhythm immediately,” pahayag ni Black. “Our ability to defend in transition and also the three-point line will be keys.”

Kakapitan ni Black ang kanyang import na si Allen Durham at locals Baser Amer at Allein Maliksi para makuha ang inaasam na panalo.