Estudyante, 8 pa arestado sa ilegal na droga

Siyam katao ang nahuli sa buy-bust operation na pawang nasa drugs watchlist ng pulisya kabilang ang isang menor-de-edad sa Pasay City, kamakalawa ng gabi.

Kulong ang mga suspek na sina Rosemarie Yanoc, 47, ng Bgy. 178, Zone 19, Maricaban; Catherine Enriquez, 42; Rowena Hachaso, 25; Charisse Ferrer, 31; Arvin Fajardo, 34, construction worker; Reynaldo Alarcon, 57, painter; Mayder Acero, 36; Leopoldo Paras, 37, sidecar boy, pawang nasa drugs watchlist at ang 15-anyos na estudyante.

Base sa ulat, nagkasa ng buy-bust operation ang mga tauhan ng Station Drug Enforcement Unit sa pangunguna ni Capt. Deni Mari Pedrozo laban kay Yanoc na ikinaaresto ng iba pang suspek, alas-10:15 ng gabi.

Nakuha sa mga suspek ang 18 pakete ng hinihinalang shabu na may timbang na 18.7 gramo at may street value na P127,160; P500 buy-bust money; apat na aluminum foil strips na may bakas ng umano’y nasabing droga at isang maliit na kahon.

Dinala ang mga nakumpiskang ebidensiya sa SPD Crime Laboratory para sa chemical analysis. Nakatakdang sumailalim sa inquest proceedings ang mga suspek sa Pasay Prosecutor’s Office para sa kasong Comprehensive Dangerous Drugs Act of 2002.