Mayag ng muay pasok na sa semis, divers, lulusong na sa Aquatics

Tinalo ni Alexis Mayag ng ‘Pinas si Sulaeman ng Indonesia upang makapasok sa semifinals 48 kilograms ng 30th Southeast Asian Games muay competitions sa Subic Bay Exhibition and Convention Center.

Tiniyak na ni Mayag, ang bronze nang talunin si Sulaeman, 30-27. Unang napagwagian ng Philippine Muay Thai team ang gold at silver sa waikru at mai muay events noong Miyerkules. Abanse rin sa semifinals ng 63.5 kgs class ang Cambodian na si Lao Chetra na tumalo kay Soubinh Banxadeth ng Laos, 30-27; maging ang top favorite Ratchaphon Thapthan ng Thailand ay abanse rin sa semis sa dikit na 29-28 win laban kay Soulixay Singsavath ng Laos.

Samantala, dadayb na sa bagong Aquatics center ang Pinoy divers sa simula ng preliminary rounds ng 30th SEAG diving competitions sa New Clark City Aquatics Center sa Capas, Tarlac.

Kakampanya na para sa biennial debut sina Fil-Am Monique de Maisip, ang double gold medalist ng Asian age group championships sa Bangalore, India noong Oktubre, at Rose Ann Ocmer sa women’s three-meter springboard diving event ng 12:30 a.m. Makakalaban nila ang divers ng Malaysia, Thailand, Singapore at Vietnam. Walang entry ang ‘Pinas sa men’s synchronized three-meter springboard competition ng 3:30 a.m.

Sa Sabado, tanging si Francis Deorelar, na naka-gold sa Asian age group meet ang entry sa men’s three-meter springboard diving event habang sina Demaisip at Ocmer ay team up sa women’s synchronized three-meter springboard event.

Hindi nakalahok ang ‘Pinas sa diving event noong 2017 Malaysia SEAG habang ang huling nakagintong Pinoy divers sa SEAG ay noong 2007 Thailand edition.