Kulong at multa sa magsusulat sa perang papel

Dr. Persida V. Rueda-Acosta / Magtanong Kay Attorney

Dear Chief Acosta, Ano ang kaparusahan sa mga taong nagsusulat ng kung anu-ano sa perang papel ng Pilipinas? — Ron

Dear Ron, Para sa inyong kaalaman, ang inyong katanungan ay binigyang-linaw ng Presidential Decree No. 247 o mas kilala sa tawag na “Prohibiting and Penalizing Defacement, Mutilation, Tearing, Burning or Destruction of Central Bank Notes and Coins” kung saan nakasaad na:

“1. That it shall be unlawful for any person to willfully deface, mutilate, tear, burn or destroy, in any manner whatsoever, currency notes and coins issued by the Central Bank of the Philippines; and

2. That any person who shall violate this Decree shall, upon conviction, be punished by a fine of not more than twenty thousand pesos and/or by imprisonment of not more than five years.” (Binigyang-diin)

Samakatwid, ang pagsusulat sa perang papel ng Pilipinas ay maaaring maituring na defacement at ang sinumang napatunayang gumawa nito ay papatawan ng multa, pagkakakulong o pareho, batay sa nabanggit na batas.

Nawa ay nasagot namin ang inyong katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.

Maraming salamat sa patuloy ninyong pagtitiwala.