Bronze medal, ibubulsa ng ‘Pinas sa floorball

Target ng men’s at women’s National Floorball team na makuha ang bronze medal laban sa parehong Malaysian team’s para sa medal matches sa UP College of Human Kinetics Gymnasium sa Quezon City.

Isang milagrong buzzer-beater win ang naibuslo ni Lucas Oijvall mula sa pasa ni Christian Schoultze sa nalalabing 1 segundo (59:59) ng laro para ungusan ang Malaysia via 8-7. Pinamunuan ni Schoultze ang iskoring ng men’s team sa 3 goals habang 2 goals ang nagawa ni Oijvall samantalang tig-isang goals sina Hazzer Talingdan, Henrik Dahmen at Christoffer Holand. Makahaharap nila ang Malaysia ng 4 p.m habang magtatapat ang top teams Thailand at Singapore sa gold at silver match ng 6 p.m.

Tansong medalya rin ang kumpiyansang tatargetin ng women’s team sa 9:00am match laban din sa Malaysia matapos mauwi sa draw ang laban nila sa 4-4 nitong Biyernes ng hapon. Nagawang maipasok ni forward Roxanne Ruiz ang importanteng panabla sa nalalabing 57:58 upang ilatag ang bronze medal match-up sa Malaysia sa 9 a.m.

“We already know their strategies towards our game, kase inilabas na nila lahat eh, but us, may mga itinatago pa kaming secret weapons. And we will see that coming Sunday. We’ll make sure that we’ll get that bronze medal,” wika ni team captain Jade Rivera.

Samantala, sisimulan na ng Philippine Arnis ang kampanya ngayon sa full contact live stick sa men’s -55kgs, -60kgs, -65kgs, +65kgs, -50kgs, -55kgs, -60kgs at+60kgs sa women’s sa Angeles University Foundation sa Pampanga.

Sasabak sa team event ang men’s and women’s badminton team na maghaharap ng unang medalya sa Muntinlupa Sports Complex.