Araw-araw daw kinakausap para 'di magbago ng isip… Apl.de.Ap, isinama ang mga co-Black Eyed Peas

Nitz Miralles / Bida

Bukas na ang opening ceremony ng 2019 SEA Games na gagawin sa Philippine Arena at paalala sa mga manonood, dumating nang maaga dahil by 5 PM, hindi na magpapapasok sa venue.

Nakapanood kami sa dress rehearsal kung saan si Lani Misalucha ang kakanta ng Philippine National Anthem at sa pagkanta pa lang niya, kikilabutan na ang manonood, mapa-live o TV coverage man.

Magaganda rin ang production numbers na inihanda mula sa folk dancing at songs na magpapakita sa Filipino art, culture, design and music. Ipagmamalaki kahit ng mga nagne-nega sa SEA Games ang presentation ng apat na major production numbers.

Kasama sa mga performers sa opening ceremony si Apl.de.Ap na kakantahin ang original composition ni­yang Bebot. Kasama sa mga performers sina Aicelle Santos, Christian Bautista, Ana Fegi, Jed Madela, Elmo Magalona, The TNT Boys, Iñigo Pascual, KZ Tandingan at Robert Seña.

Kasama rin si Apl.de.Ap sa performers sa closing ceremony na gagawin sa New Clark City. Nakumbinse nito ang mga kasama sa Black Eyed Peas na sina Will.i.am at Taboo na mag-perform kasama ang Pinay na si Jessica Reynoso na pansamantalang kapalit ni Fergie.

“I feel truly honored and proud na maging part ng SEA Games dito sa bansa natin, especially it only happens every 20 years. Nakaka-proud because sa hometown ko ang SEA Games, that’s why I volunteered sa torch run. I’m so excited, elated and proud and I wanna be a part of this and one to represent our country,” wika ni Apl.de.Ap.

Nabanggit din ni Apl.de.Ap na he has to force his co-Black Eyed Peas member to perform sa closing ceremony at makakasama nila si Arnel Pineda. Araw-araw daw ni­yang kausap sa phone si Will.i.am to make sure na hindi magbabago ang isip nito.

Ang mangyayari, after ng performance nila, balik agad sa Manila si Will.i.am para habulin ang flight niya at ituloy ang mga ginagawa.

“I told Will.i.am, do it for me because I’m very proud na dito ang SEA Games at sa hometown ko pa. Watch out for our new album and our new single and you can expect that I’ll sneak a Tagalog song,” sabi ni Apl.de.Ap.

Naibalita rin ni Apl.de.Ap na magkakaroon sila ng collaboration nina James Reid, KZ Tandingan at iba pang Filipino artists at dadalhin niya sa States.