Estudyante, walang discount sa plane ticket 'pag papunta sa ibang bansa

Dr. Persida V. Rueda-Acosta / Magtanong Kay Attorney

Dear Chief Acosta, Magandang araw! Nais kong malaman kung maaari bang makakuha ang anak kong college student ng student discount sa ticket sa eroplano patungo sa Japan? Salamat! —Jessie

Dear Jessie, Para sa inyong kaalaman, ang inyong katanungan ay binigyang-linaw ng Section 5 ng Republic Act (R.A.) No. 11314 o kinikilala bilang “Student Fare Discount Act” na nagsasabing:

”SECTION 5. Student Fare Discount Privilege. — A student under this Act shall be entitled to a grant of twenty percent (20%) discount on domestic regular fares, upon personal presentation of their duly issued school identification cards (IDs) or current validated enrollment form, supported by the prescribed government-issued identification document, subject to an appropriate verification mechanism to be provided in the implementing rules and regulations (IRR): Provided, That in the case of air public transportation utilities, the discount shall only apply to the base fare or the price of the ticket before taxes and costs for ancillary services.” (Binigyang-diin)

Ayon sa nabanggit na probisyon ng batas, ang mag-aaral ay may karapatan sa dalawampung porsiyentong (20%) diskuwento para sa domestic regular fares o regular na pamasahe sa eroplano kung saan ang destinasyon ay nasa loob lamang ng Pilipinas.

Samakatwid, ang pamasahe sa eroplano na ang destinasyon ay sa labas ng Pilipinas ay hindi maaaring isailalim sa nabanggit na diskuwento sapagkat ito ay hindi na sakop ng nabanggit na batas.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.