Mag-asawang supplier ng solvent sa mga bata, kulong

Timbog ng mga tauhan ng Dagupan Police Community Precint ang mag-asawang supplier ng solvent sa mga batang lansangan, kamakalawa ng hatinggabi sa Tondo, Manila.

Kinilala ni PSMS Gerardo Tubera, ang mga suspek na sina Romeon Lontoc, 36, at Esperanza Lontoc, 31, kapwa ng Lakandula St., Tondo.

Ani Tubera, nagsasagawa sila ng anti-criminality campaign sa lugar nang makatanggap ng impormasyon kaugnay sa ilegal na gawain ng mag-asawa.

Nang beripikahin, nagpositibo ang sumbong kaya binitbit sa presinto ang mga suspek.

Nakumpiska sa mag-asawa ang tatlong plastic containers ng solvent, isang timba at maliit na plastic container na may lamang solvent.

Ang mag-asawa umano ang nagsu-supply at nagbebenta sa mga solvent boy sa Tondo area.