Jueteng lords, party-party ‘pag si Gen. Danao ang naging chief ng PNP
- Pabs Hernandez III
- Nov 19, 2019
- 2 min read
KAPAG NAGING PNP CHIEF SI GEN. DANAO, BAKA MAGPIYESTA ANG MGA JUETENG LORD — Nang sabihin ni Sen. Christopher “Bong” Go na bukod sa mga 3-star generals at 2-star generals ay namimili rin si P-Duterte sa hanay ng mga 1-star generals para maging PNP chief ay biglang lumutang ang pangalan ni PNP-Region 4-A Director Brig. Gen. Vicente Danao, Jr. na baka ito ang maitalagang hepe ng PNP kasi bukod sa taga-Davao City ay kilalang tao ito ng pangulo.
Ang problema kapag si Gen. Danao ang naging PNP chief, baka magpiyesta na naman ang mga jueteng lords kasi nang maitalaga itong director ng PNP-Region 4-A ay biglang nakapag-operate ng jueteng sa Cavite ang jueteng lord na si “Ariza”, boom!
***
DAPAT UMAKSIYON SI GEN. DANAO LABAN SA JUETENG NI “ARIZA” AT PARAK NA “TONGPATS” COLLECTOR — Bukod sa jueteng ni “Ariza”, hataw din daw sa “tongpats collection racket” ang mga parak na sina “Chan” (Cavite), “Batman and Robin” (Laguna), “Florence” (Batangas), “Milan” (Rizal) at ang koleksiyon daw nila sa mga ilegalista ay ibinabagsak nila sa isang “Juancho”.
Kung walang kinalaman si Gen. Danao sa jueteng ni “Ariza” at sa raket nina “Chan”, “Batman and Robin”, “Florence” at “Milan” ay dapat ipa-“tokhang” agad niya ang mga ito, period!
***
KUNG UMASTA SI MAYOR MAGALONG AKALA MO WALANG ILEGAL SA BAGUIO CITY, MERON PALA! — Noong panahon ni dating Mayor Mauricio Domogan, walang ilegalistang nakapanraket sa Baguio City. Pero ngayong si Mayor Benjamin Magalong na ang alkalde, may raket na drop balls at color games na raw sina “Buda” sa Slaughter Compound at “Nestor” sa Kayang Street, kapwa sa lungsod na ito.
Hay naku, kung makapagsalita si Mayor Magalong sa Senate hearing laban kay ex-PNP Chief Gen. Oscar Albayalde ay akala mo walang ilegal sa kanyang nasasakupan, pero meron pala, buwisit!
***
MGA MANRARAKET SA MAYNILA, TAGILID KAY MAYOR ISKO — Sa lahat ng ayaw ni Mayor Isko Moreno ay ‘yung may mga “nanraraket” sa Maynila.
Kaya huwag pakasisiguro ang mga parak na sina “Tata Delo”, “Tata Itoy” at “Tata Jokson” na protektor ng bookies nina “Boy Abang” at “Paknoy” at lotteng nina “Don Ramon” at “Jun Moriones” na sila ay mga “untouchable” kasi kung dedma sa kanila si MPD Director, Gen. Bernabe Balba, tiyak kay Mayor Isko, may “paglalagyan” sila. Abangan!
Comments