Bagyong Ramon, tatambay pa nang matagal sa 'Pinas

Halos ayaw umusad habang patuloy na nagdadala ng pag-ulan sa hilagang Luzon ang Bagyong Ramon na tinatayang magtatagal pa sa teritoryo ng bansa.

Ayon sa Philippine Atmospheric, Geophysical and Astronomical Services Administration (PAGASA), nananatili pa rin sa West Philippine Sea sa silangan ng Northern Luzon ang bagyo.

Huling namataan bandang alas-10:00 kahapon ng umaga ang bagyo sa layong 420 kilometro ng hilagang-hilagang silangan ng Virac, Catanduanes. Ilang araw na ring nasa bahagi ng Virac ang bagyo. Mula sa unang tinataya na lalabas ng Philippine Area of Responsibility sa Miyerkules ay posibleng magtagal pa ito hanggang Huwebes.

Ibinabala ng PAGASA ang paminsan-minsang malakas na pag-ulan sa mga lugar na nasa ilalim ng Tropical Cyclone Wind Signal No. 1 kabilang ang eastern portion ng Cagayan at Isabela, gayundin ang Northern Aurora.

Sa Linggo ay asahan din ang mahina hanggang sa katamtaman at paminsan-minsang malakas na pag-ulan sa Apayao, Kalinga at nalalabing bahagi ng Isabela at Cagayan.

Samantala, patuloy namang makaaapekto sa Northern Aurora, Aurora at Bicol Region ang Northeast Monsoon (Amihan).

Patuloy ang babala ng PAGASA sa paglalayag sa karagatan dahil sa mataas na alon.