Halaga ng tamang upa, sa DARAB dapat ipatsek

Dr. Persida V. Rueda-Acosta / Magtanong Kay Attorney

Dear Chief Acosta, Nais kong malaman kung saan ako nararapat lumapit upang maipasuri ko ang aking leasehold contract, partikular ang halaga ng leasehold rentals? Gayundin, kung tama ang halagang ipinapataw sa akin ng may-ari ng lupa? — Jorah

Dear Jorah, Para sa inyong kaalaman, ang panuntunang naaangkop sa inyong sitwasyon ay ang Section 1 (g), Rule II ng 2009 Department of Agrarian Reform Adjudication Board (DARAB) Rules of Procedure kung saan nakasaad na:

“RULE II

Jurisdiction of the Board and the Adjudicators

SECTION 1. Primary and Exclusive Original and Appellate Jurisdiction. The Board shall have primary and exclusive jurisdiction, both original and appellate, to determine and adjudicate all agrarian disputes involving the implementation of the Comprehensive Agrarian Reform Program (CARP) under R.A. No. 6657, as amended by R.A. No. 9700, E.O. Nos. 228, 229, and 129-A, R.A. No. 3844 as amended by R.A. No. 6389, Presidential Decree No. 27 and other agrarian laws and their Implementing Rules and Regulations. Specifically, such jurisdiction shall include but not be limited to cases involving the following:

g. Those cases involving the review of leasehold rentals and fixing of disturbance compensation; xxx “ (Binigyang-diin)

Malinaw sa nabanggit na panuntunan na bahagi ng jurisdiction ng DARAB ang mga kaso kaugnay ng pagsusuri ng mga leasehold rentals o ng tamang halaga ng disturbance compensation. Samakatwid, sa DARAB ninyo nararapat na ipasuri ang inyong kontratang mayroong kaugnayan sa halaga ng inyong leasehold rentals.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.