Sen. Ping, binigyan ng tip si VP Leni para madale ang mga bigtime drug lords
PINALALABAS NI SEN. LACSON NA SMALL TIME PUSHERS LANG ANG NADADALE NG DUTERTE GOV’T.—Ayon kay Sen. Panfilo “Ping” Lacson, binigyan na raw niya ng tips si VP Leni Robredo, bilang co-chairman ng Inter-Agency Committee on Anti-Illegal Drugs (ICAD) para malansag ang mga bigtime drug lords sa bansa.
Sa tema ng pahayag ni Sen. Lacson, parang pinalalabas nitong small time lang ang nadadale ng Duterte administration kaya ang mga bigtime drug lords ang pinalalansag niya kay VP Leni, boom!
◘◘◘
SA LIDERATO NI SPEAKER CAYETANO, MAY PORK BARREL NA NAMAN ANG MGA CONG.—Kinumpirma ni Sen. Lacson na may tig-P500 milyong “pork barrel” daw ang bawat kongresista na kasapi ng super majority na isiningit daw ng Kongreso sa 2020 National Budget.
Ang sinabing ‘yan ni Sen. Lacson ay pagpapatunay na sa ilalim ng liderato ni Speaker Alan Peter Cayetano, piyesta na naman sa “biyaya” ang mga pork barrel politicians, buwisit!
◘◘◘
“TATA DELO” NA “TONGPATS COLLECTOR”, DAPAT ITAPON SA BASILAN—Pulis daw ang isang “Tata Delo” na gumagamit sa pangalan ni newly appointed MPD Director Gen. Bernabe Balba para makapanghingi ng “payola” sa jueteng nina “Lito” at “Kit”; bookies nina “Boy Abang” at “Paknoy” at lotteng nina “Don Ramon” at “Jun Moriones” sa Maynila.
Kung seryoso sina PNP-OIC Gen. Archie Gamboa at NCRPO Director Gen. Debold Sinas sa kanilang “no take policy”, dapat ipatapon nila sa Basilan si “Tata Delo”, period!
◘◘◘
RAKET NA DROP BALLS AT COLOR GAMES NI “LESLIE”, NAG-OPEN NA SA BULACAN—Balik-operasyon na naman daw ang raket na drop balls at color games ni “Leslie” sa Sapang Palay, San Jose del Monte City, Bulacan.
O, ano, Bulacan PNP Director, Col. Chito Bersaluna, “nganga” ka na lang ba sa raket ni “Leslie”? Aba, aksiyon na, dali!
Comments