Mga kampeon sa 5 bakanteng titulo, hinahanap ng GAB

Kagyat na tumugon ang mga managers, matchmakers at promoters sa panawagan ng Games and Amusement Board (GAB) na mapunuan sa lalong madaling panahon ang limang bakanteng Philippine championship titles.

Pag-aagawan nina Ar-ar Andales ng Cavite City at Joel Lino ng Davao City sa 12-round match ang bakanteng minimumweight title sa Nobyembre 15 sa Mindoro City, habang magtutuos sa 12-round fight sina Chris Paulino ng Rizal at Wilbert Berondo ng Parañaque City sa December 14 para sa bakanteng Super-Flyweight Championship sa The Flash Ballroom, Elorde Sports Center, Sucat, Parañaque City at nakataya ang bakanteng super featherweight title sa pagitan nina Al Toyogon ng Misamis Oriental at Marbon Bodiongan ng Lipa City.

Samantala, binawi kay Genesis Libranza ang kanyang flyweight title bunsod ng kabiguan na maidepensa ang korona sa takdang panahon matapos masungkit ang tagumpay.

Batay sa Article 20 ng Amended Manual Governing Professional Boxing in the Philippines, nakasaad na kailangan madepensahan ng kampeon ang titulo sa loob ng anim na buwan. Nakamit ni Libranza ang titulo noong Oktubre 14 ng nakalipas na taon.

Ipinahayag nina GAB Chairman Abraham ‘Baham’ Mitra, Commissioner Mar Masanguid at Ed Trinidad ang pasasalamat sa naging tugon ng boxing promoters na gawin ang Philippine Championship upang maiwasan ang malaking kakulangan sa boxing rating.

Sa pinakabagong GAB ranking , lima ang kasalukuyang kampeon, ito ay sina Giovanni Escaner ng Parañaque City bilang Philippine (GAB) Bantamweight (118 lbs) Champion, Mark Anthony Geraldo ng Valencia City, Bukidnon bilang Philippine (GAB) Super- Bantamweight (122 lbs) Champion, Roldan Aldea ng Kabankalan City, Negros Occidental bilang Philippine (GAB) Lightweight (135 lbs) Champion, Jheritz Chavez ng San Pedro, Laguna bilang Philippine (GAB) Super Lightweight (140 lbs) Champion, at Jayar Inson ng Davao City bilang Philippine (GAB) Welterweight (147 lbs) Champion.