P33 bilyon kada taon, nawawala sa ‘Pinas dahil sa maagang pagbubuntis ng mga edad 10

Kuya Win Gatchalian / Win Tayong Lahat

Isa sa mga usapin na kailangang tutukan ng ating gobyerno ay ang lumulobong bilang ng mga kabataang nagbubuntis habang sila ay nag-aaral kung saan ka­ramihan sa kanila ay mga menor-de-edad.

Bilang chairman ng Senate Committee on Basic Education, Arts and Culture, ito ay ating binibigyang-atensiyon at pinag-aaralan upang mas maintindihan ang suliraning ito.

Kamakailan ay nanawagan ang Commission on Population and Development (PopCom) na idekla­rang national emergency ang teenage pregnancy.

Ito ang dahilan kung bakit nais nating mag­hain ng resolusyon upang magkaroon ng pagdi­nig sa Se­nado para pagtibayin ang Comprehen­sive Sexuality Edu­cation (CSE) dahil umaasa tayong makatutulong ito upang mabawasan ang mga kaso ng maagang pagbu­buntis sa bansa.

Sa kabila ng pagsasabatas ng Reproductive Health (RH) Law noong 2012, siyam na por­siyento (9%) sa 4.9 milyong mga kababaihang may edad 15-19 ang nagsimula nang maging ina.

Mula noong 2011 hanggang 2017, umakyat sa mahigit 50 porsiyento (50%) ang bilang ng pagbu­buntis sa kababaihang may edad na 10 hanggang 14. Ayon sa pag-aaral ng PopCom, 30 hanggang 50 kaso rito ay pagbubuntis ng mga batang may edad 10.

Sadyang nakapangangamba rin ang datos ng 2017 Annual Poverty Indicators Survey ng Philippine Sta­tistics Authority (PSA) dahil ayon sa pag-aaral, ang pagpapakasal at mga usaping-pampamilya ang mga pangunahing dahilan ng hindi pagpasok ng mga ba­baeng out-of-school children and youth (OSCY) na may labing-anim hanggang 24 taong gulang.

Dahil dito, napagkakaitan ang mga kabataan nang maayos na kalusugan at magandang kina­bu­kasan kung hindi natin sila nagagabayan sa usapin ng RH Law.

Naniniwala tayong kung may mabisang programa at sapat na kakayahan ang mga paara­lan upang ituro ang CSE, maiiwasan natin ang pagdami ng mga ba­tang tumitigil sa pag-aaral dahil sa maagang pag­bubuntis tulad na lamang ng pag-aaral ayon sa 2017 National Demogra­phic and Health Survey (NDHS) ng PSA.

Nakita rin sa kanilang pag-aaral na mas ma­taas ang posibilidad ng maagang pagbubuntis sa mga ka­bataang nakatira sa labas ng mga lungsod.

Ayon sa NDHS, 10 porsiyento ng ka­ba­­baihang mula sa labas ng mga siyudad at may edad na 15 hanggang 19 ang nagsimula nang magbuntis.

Mas mataas ito ng tatlong porsiyento (3%) sa bilang ng kababaihang nasa parehong edad at naka­tira sa mga lungsod.

Ayon pa sa United Nations Popu­lation Fund (UNFP), P33 bilyon kada taon ang na­wawala sa ating bansa dahil sa mga kaso ng teenage pregnancy.

Ang hindi nila pagpasok sa paaralan, ka­walan ng sapat na impormasyon at kakulangan sa panganga­laga ay ilan lamang sa mga dahilan kung bakit ma­agang nabubuntis ang mga ka­bataang ito, lalo na ang mga kabilang sa pamilya na may kakapusan sa mga gastusin.

Higit sa lahat, ang malungkot na epekto nito ay ma­aaring makasira sa kanilang edukasyon at kina­bukasan.

Dahil dito, mahalagang mag­karoon ng mga po­lisiya at pamantayan upang masiguradong matu­gunan ang ganitong sit­wasyon.

Tandaan, ang pagpoprotekta sa kabataan mula sa maagang pagbubuntis ay masusing daan upang sila ay maging matagumpay at produktibong mi­yembro ng ating lipunan.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com