Munzon at Pasaol, highest rank sa FIBA 3X3 Olympic qualifying

Nakatitiyak na ng kanilang slots bilang mga highest rank players ng bansa sina Joshua Munzon at Alvin Pasaol sa Philippine Men’s National 3x3 Basketball Team na nakatakdang lumahok sa 2020 FIBA 3X3 Olympic Qualifying Tournament sa darating na Marso ng susunod na taon sa Delhi, India.

Ang dalawa ang kasalukuyang top ranked 3x3 players ng bansa base sa natipon nilang ranking points.

Si Munzon ang no.1 sa taglay nitong 475,860 points kasunod si Pasaol na may 420,940 points.

At dulot na rin ng kanilang ranking at malawak na karanasan sa global stage, sinabi ni Chooks-to-Go Pilipinas 3x3 league commissioner at program director Eric Altamirano na ang dalawang nasabing players ang maituturing na “most qualified” upang mamuno sa national team. “Obviously, we need to have the top ten players in the country, especially the top two. Joshua and Alvin are most likely going to be part of the team,” wika ni Altamirano sa nakaraang thanksgiving celebration para sa pagpasok ng bansa sa OQT noong Sabado ng gabi.

Ang iba pang players na nasa top 10 ay sina Santi Santillan, Karl Deesa, Troy Rike, Dylan Ababou, Chris De Chavez, Franky Johnson, Roosevelt Adams at Leo De Vera.

Subalit may nililinaw pa ang Chooks-to-Go at ng Samahang Basketbol ng Pilipinas sa FIBA tungkol sa kanilang panuntunan sa pagpili ng mga players.

At kung maaari pang makapagdagdag ng puntos ang players hanggang Pebrero.

“From there, we need to clarify the rules regarding who can be the rest of the team,” ayon pa kay Altamirano.

“As soon as we clarify the rule in terms of the composition of the team, we are not discounting the possibility of getting players outside of our league, including the PBA.”