Squash venue ng SEAG ililipat sa Manila Polo

Hindi na aabot sa takdang oras ang pagkumpleto ng Squash venues sa loob ng Rizal Memorial Sports Complex dahil sa hindi kasiguruhang pagdating ng mga gagamiting equipments para sa 30th Southeast Asian Games sa bansa.

Ayon kay Philippine Squash Academy (PSA) president Robert Bachmann, naabisuhan na niya ang Philippine Southeast Asian Games Organizing Committee (Phisgoc) na lilipat na sila ng Manila Polo Club, sa Makati City dahil malabo na umanong matapos ang ginagawang konstruksyon sa loob RMSC venues.

“Inunahan ko na sila (Phisgoc) na lilipat na kami sa Manila Polo na dapat kase last year pa iyang renovation na iyan,” pahayag ni Bachmann sa panayam ng Bulgar sa audio call ng FB messenger. “I already wrote a letter last October 21 before we left, telling them that we need to change our venue,” dagdag ni Bachmann na kasalukuyang nasa Cairo, Egypt kasama si Top-Squash player ng bansa na si Jemyca Aribado para lumahok sa World Squash Championships.

Sinabi ni Bachmann na maaaring matapos ang tinatayong pasilidad sa takdang araw, ngunit, malabo umanong umabot sa oras ang mga kagamitan na manggagaling pa ng Germany. Sakali daw umabot ang equipments ay maglalaan pa ng tatlong (3) linggo para maikabit ang mga ito.

“I already warned them since July na kailangan ng magawa yung facility. This week lang magbabayad and it takes 3-4 weeks to manufacture it. Maybe Nov 28-29 maipapadala lang pero it takes three weeks to install the wall glass and floorings,” wika ni Bachmann. “The problem here is ang haba ng naging usapan with regards to purchasing the equipment’s. They are shopping for cheaper prices and end up with the same supplier,” dagdag nito.

Mayroong tatlong courts na puwedeng laruin ng singles at doubles ang Squash courts ng Manila Polo Cub na inamin rin ni Bachmann na daraan muna sa mabilisang ‘renovation’ simula November 3 o 4 hanggang Nov. 17.