Makaka-gold sa Sibol SEAG, may insentibong P2-Milyon

Bibiyayaan ng insentibong pinansiyal ang makaka-gold medal sa team ng Sibol, ang kinatawan ng bansa sa Esports para sa 30th Southeast Asian Games na idaraos sa FilOil Flying V Arena sa Disyembre.

Itatakda muna sa Nobyembre 4 sa FFV Arena ang test event na lalahukan din ng Singapore, Indonesia at Thailand upang masukat ang kakayahan ng Sibol team na sasabak sa SEAG Esports sa Dis. 5-10.

Sa pormal na pagpapakilala sa national team ng Smart telecoms at PLDT kasabay ng partnership sponsors sa team sa Makati City, ayon kay Smart Communications Inc. president Al Panlilio ang makaka-gintong medalya para sa individual sports ay bibigyan ng P1-M na cash incentive habang ang gold medalists sa team sports ay may P2-M.

Mula sa orihinal na 77-man training pool, pinal nang binuo ng Philippine Southeast Asian Games Esports Union (PSEU) ang final 27 athletes sa national Esports team na Sibol. Paglalabanan ang mga medalya sa 6 na Esports titles (Mobile Legends: Bang Bang, DOTA 2, Arena of Valor, StarCraft II, Hearthstone at Tekken 7). Lalahok din sa Esports ang Brunei, Cambodia, Laos, Malaysia, Myanmar East Timor, at Vietnam sa SEAG.

Lalaban para sa Tekken 7 ang mga young champions na sina Alexandre “AK” Laverez at Andreij “Doujin” Albar. Sa mobile legends Bang Bang ay sina Kenneth Jiane ‘Kenji’ Villa; Karl Gabriel ‘KarlTzy’ Nepomuceno; Carlito ‘Ribo’ Ribo; Jeniel ‘Haze’ Bata-anon; Angelo Kyle ‘Pheww’ Arcangel; Allan Sancio ‘Lusty’ Castromayor; Jason Rafael ‘Jay’ Torculas.

Sa DOTA 2 ay sina Mc Nicholson ‘Mc’ Villanueva; John Anthony ‘Natsumi’ Vargas; Jun ‘Bok’ Kanehara; Marvin Salvador ‘Boomy’ Rushton; Bryle Jacob ‘CML’ Alvizo; Van Jerico ‘Van’ Manalaysay at James Erice ‘Erice’ Guerra.

Sa Arena of Valor ay sina Kevin Kio ‘Gambit’ Dizon; Jeremiah ‘1717’ Camarillo; Jevan Lorenzo ‘Bents’ Delos Santos; Lawrence Anthony ‘Rubixx’ Gatmaitan;

Miguel Klarenz ‘Miggie’ Banaag; Bradie Ryan ‘Yats’ Velasquez at Kyle Jepherson ‘Vindiicated’ Padlan. Sa StarCraft II ay sina Justin ‘NuksPH’ Santos at Caviar ‘Enderr’ Acampado habang sa Hearthstone ay sina Dustin ‘WaningMoon’ Mangulabnan at Jacinta ‘Jia’ Dee.