Kelot natulog, sinilaban ng mga katoma

Dala umano ng sobrang kalasingan kaya napagtripan ng grupo na silaban ang isang lalaki na kanilang kainuman sa Davao City, kamakalawa.

Nalapnos ang likurang bahagi ng katawan ng biktimang si William Chiong, 29, dahil sa mistulang nagdingas ng apoy ang mga suspek gamit ang tuyong mga dahon at plastic sa likod nito.

Ayon kay Toril Police Station Commander Lt. Col. Jed Clamor, nangyari ang insidente sa Bgy. Bangkas Heights pasado alas-10:00 ng gabi ng Sabado habang nag-iinuman ang biktima at ilang lalaking kainuman nito na kanyang mga kapitbahay.

Sa imbestigasyon, iniwan ng biktima ang inuman at nagtungo sa ilalim ng puno at doon nakatulog dahil sa kalasingan.

Gayunman, napagtripan itong gisingin ng mga lasing na suspek sa pamamagitan ng pagsilab sa damit nito gamit ang dahon ng niyog at mga plastik pero hindi agad nagising si Chiong kaya lumaki ang apoy dahilan para malapnos ang balat nito na umabot sa 3rd degree burns.

Dinala sa pagamutan si Chiong at nagsususuka umano ito habang ginagamot sa tinamong pinsala ng pagkasunog. Pinaghahanap na ng pulisya ang mga suspek kaugnay sa krimen.