Comboy ng FEU, nanuwag, UP, dumidikit sa playoffs

Nakaligtas ang Far Eastern University sa kanilang mga naging krusyal na errors matapos ungusan ang Adamson,63-60 sa UAAP 82 Men’s Basketball Tournament. Umiskor ng tig-11 puntos sina Wendell Comboy, L-Jay Gonzales at Ken Tuffin upang pamunuan ang panalo. Dahil sa tagumpay umangat ang Tamaraws sa markang 7-6, panalo-talo na nagpatatag ng kapit nila sa ika-4 na puwesto.

Sa unang pagkakataon, hindi umabot sa Final 4 ang Soaring Falcons sa loob ng apat na taon makaraang bumaba sa 4-8 na marka.

Sa unang laban, nakalapit ang University of the Philippines sa target na ikalawang playoffs slot matapos talunin ang National University, 80-77. Nanguna si Kobe Paras sa panalo sa iniskor niyang 19 puntos bukod pa sa 6 assists at 4 rebounds kasunod si Juan Gomez De Liaño na may 11 puntos, 11 rebounds, 6 assists at 2 steals. Sanhi ng tagumpay, umakyat ang Fighting Maroons sa markang 8 panalo at 4 na talo at ngayo’y nakatitiyak na ng playoffs para sa isang Final 4 berth. Pero gaya ng inaasahan, hindi naging madali para sa kanila ang makopo ang panalo. Katunayan, naibaba sa dalawa ang kanilang kalamangan ng Bulldogs, 77-79, may 11.5 segundo pa ang natitira sa laban kasunod ng dalawang freethrows ni Shaun Ildefonso.

Mula roon, naka-split ng freethrows si Jun Manzo habang umikot- ikot sa bunganga ng ring bago lumuwa ang ipinukol ni Ildefonso na dapat ay winning 3-pointer.

Tumapos na leading scorer para sa National University na bumagsak sa 2-10 na kartada ang kapatid ni Shaun na si Dave Ildefonso na may 24 puntos, 6 rebounds, 6 assists at 3 steals.