PHL archers, pinatindi ang training para sa 3 Major Tilt

Tatlong major tournaments ang lalahukan ng Philippine National Archery team sa susunod na dalawang buwan. Pinaigting pa ng 16-man archery team ang kanilang paghahanda para sa Asian Championships at sa Continental Olympic Qualifier sa susunod na buwan at sa 30th SEA Games sa Disyembre.

Ang buong team ay nakabase na sa camp ng F.R. Sevilla Archery Range sa Novaliches, Quezon City mula pa noong Setyembre matapos ang Asia Cup, na nagsisilbi ring Sea Games Archery test event sa Clark, Pampanga.

Sumasailalim ang Pinoy Archers sa araw-araw na matitinding training at weekly evaluation sa ilalim ng paggabay ng national coaches na sina Clint Sayo, Joy Marino at Foreign coach Chong Yap Lee ng Malaysia.

Patuloy na umiibayo ang scores ng mga atleta ayon kay Archery Secretary General Ròsendo Sombrio habang papalapit ang kompetisyon. Idinagdag ni Sombrio na dahil sa suporta ng Philippine Sports Commission, ang Philippine Archery Team ay may dalawang linggong training camp sa Nob. 6-21 sa Bangkok, Thailand kung saan ang Asian Championships at Continental Olympic Qualifier ay idaraos sa Nob. 22-29. “It is our duty to support the national athletes. The archery team is also a recipient of the PSC’s support as we prepare for the country’s hosting of the SEA Games in November to December,” ayon kay PSC Chairman Willam Ramirez.

Ang men’s recurve team ay binubuo nina Luis Gabriel Moreno, Florante Matan, Jason Feliciano, at Carson Hastie habang ang distaff side ay binubuo nina Kareel Meer Hongitan, Pia Elizabeth Bidaure, Gabrielle Monica Bidaure at Phoebe Amistoso.

Ang men’s compound team ay sina Paul Marton Dela Cruz, Johann Olano, Arnold Rojas at Robert Badiola habang sina Jennifer Chan, Andrea Robles, Rachelle Anne Dela Cruz at Abigail Tindugan ang bumuo sa women’s compound team. Ang 30th SEAG ay idaraos sa Nob. 30-Dis. 11.