Asawa ng live-in partner binangga ng motor.. Call center agent, kulong

Kalaboso ang call center agent matapos tang­kaing patayin ang asawa ng kanyang kinakasama ma­karaan silang ireklamo ng pangangalunya at pananakot ng biktima sa Valenzuela City.

Kinilala ang suspek na si Jamil Jesse Caro Tobias, 20, ng San Mateo, Rizal.

Sa nakarating na ulat kay Valenzuela Police Chief P/Col Carlito Gaces, alas-12:15 ng madaling-araw, nag­lala­kad sa kahabaan ng Mac­Arthur Highway si Jonathan dela Cruz, 37, messenger, nang banggain siya ng mi­namanehong motorsiklo ni Tobias pagsapit sa kanto ng Gov. Santiago St., Bgy. Ma­linta.

Tumilapon ang biktima habang bumagsak din mata­pos mawalan ng kontrol sa kanyang minamanehong mo­torsiklo ang suspek suba­lit, mabilis na nakatayo, sa­bay bunot sa dalang patalim at inundayan ng saksak si Dela Cruz.

Nagawa namang ma­kailag ni Dela Cruz at mabilis na nagtatakbo hanggang sa makahingi ng tulong sa nag­papatrulyang tauhan ng PCP-4 na nagresulta sa pagkakadakip kay Tobias at pagkakakumpiska sa dala nitong patalim.

Ani Col. Gaces, nilaya­san ng kanyang asawang itinago lang pangalang “Li­gaya” si Dela Cruz saka su­mama kay Tobias.

Tinakot pa umano ni Tobias si Dela Cruz na pa­patayin matapos layasan ng asawa kaya’t ipinasya ng bik­tima na ireklamo ng death threat at adultery ang suspek noong Setyembre 14, 2019 sa Bgy. Malinta.