Waitress timbog sa shabu

Nadakma ng Bacoor Police ang isang waitress na nasa drugs watchlist sa isang buy-bust operation kamakalawa ng hapon sa Bgy. Dulong Bayan.

Kinilala ang suspek na si Lyka Paller, 21, waitress, residente ng Bgy. Dulong Bayan, Bacoor City, Cavite, nasa street level target-listed pusher ng Bacoor.

Sa ulat na isinumite ng Bacoor Police kay Cavite Provincial Director Sr. Supt. William Segun, alas-5:30 ng hapon nang ikasa nila ang buy-bust laban sa waitress.

Kasama ang ilang miyembro ng PDEA-4A, inilatag ang drug buy-bust kung saan isang police ang umaktong buyer na nakipagtransaksiyon sa dalaga.

Nabatid pa na ilang araw din nilang sinubaybayan ang suspek bago ikinasa ang buy-bust.

Nakuha rito ang walong sachets na naglalaman ng shabu na aabot sa mahigit sa limang gramo na may halagang humigit-kumulang sa P30,000.

Ang dalagang suspek ay nauna nang nai-report na nagtutulak ng droga sa kanilang barangay at kasama sa drug watchlist ng Bacoor Police.