Wala raw krisis sa transportasyon.. Hamon kay Panelo: Mag-commute ka!

Hinamon ng labor group na Kilusang Mayo Uno (KMU) si Presidential Spokesperson Salvador Panelo na mag-commute para maranasan ang pinagdaraanan ng mga pasahero.

Sinabi ni KMU Sec. General Jerome Adonis, na wala umanong alam si Panelo sa sitwasyon ng transportasyon sa Metro Manila at pinagdaraanan ng mga mamamayan na umaasa sa mga pampublikong sasakyan.

Ang pahayag ay ginawa ni Adonis matapos sabihin ni Panelo na walang transportation crisis sa Metro Manila.

“Tila hindi pa niya nararanasang mag-commute at bumiyahe nang rush hour gamit ang pampublikong transportasyon. Hinahamon namin siyang bumiyahe sa EDSA mula North EDSA o kaya mula Santolan papuntang Maynila, papunta at pauwi mula Malacañang para makita niya ang kalagayan ng ating mga kabababayan,” ani Adonis.

Samantala, nanindigan ang Malacañang na minana lamang nila sa nakalipas na administrasyon ang problema kaugnay sa transportasyon, partikular ang palpak na Light Rail Transit at Metro Rail Transit.

“The present problems in our mass transit system (LRT and MRT) are the products of many years of neglect by the previous administrations,” ani Panelo.

Nanindigan din ang Kalihim sa kanyang pahayag na walang krisis sa mass transportation ang Metro Manila.“I understand that this representation’s remarks in yesterday’s press briefing have become a subject of ridicule and hate by the President’s usual critics and detractors,” sabi ni Panelo.

“Had the critics and the nitpickers read the transcript of my remarks in the press briefing yesterday, they would have readily understood that when I said there is no mass transit crisis, I meant there is no mass transit crisis simply because there is no mass transit paralysis. Even the recent nationwide transport strike failed in paralyzing the mass transport,” sabi pa ni Panelo.

Matatandaang, noong Lunes nang sinuspinde ang operasyon ng buong LRT 2 kaugnay sa pagkasunog noong nakaraang linggo.