Back-to-back ngayong Oktubre.. Taas-singil sa tubig at kuryente

Taliwas sa naunang anunsiyo, may apat na sentimo kada kilowatt hour (kWh) na dagdag-singil sa kuryente ang Manila Electric Company (Meralco) ngayong Oktubre.

Sa abiso ng Meralco, aabot sa P0.0448/kWh ang idaragdag nila sa kanilang singilin sa October bill, kaya mula sa dating P9.0414/kWh ay magiging P9.0862/kWh na ang kanilang overall electricity rates.

Paglilinaw naman ng Meralco, bagama’t, may pagtaas sa singil ngayong buwan, mayroon pa ring total downward adjustment ng electricity rates na P1.47/kWh mula noong Abril 2019, dahil na rin sa limang magkakasunod na buwan na nagpatupad sila ng bawas-singil.

Samantala, may pagtaas din sa singil sa tubig ang Maynilad at Manila Water na papatak sa Oktubre 13. Nasa P0.17 kada cubic meter ang dagdag-singil ng Manila Water habang P0.02 naman sa Maynilad.

Ang dagdag-singil sa tubig ay kaugnay sa foreign currency differential adjustment na epekto ng palitan ng piso kontra dolyar at yen.