Tabuena, 2nd place sa Taiwan Golf Masters

Minarkahan ng Pilipinas ang isang back-to-back na podium finish sa Taiwan golf circuit sa loob ng dalawang mag­kasunod na linggo mata­pos pumanga­lawa si Mi­guel Tabuena sa taunang Mercuries Taiwan Masters sa Taiwan Golf and Country Club sa Tamsui, Taiwan.

Naisalba ni Tabuena ang isang even-par 72 (apat na birdies at apat na bogeys) sa huling round ng $900­,000 na bakbakan upang idikit sa naunang rounds na 67-72-68 at makaipon ng ka­buuang 279 strokes pagkata­pos ng 4 rounds.

Ito ay isang palo ang layo sa nagkam­peong si Thai Suradit Yong­cha­roechai pero sapat na para makasosyo sa birdesmaid honors sina Ajeetesh San­­dhu ng India at 2018 titlist Adilson Da Silva ng Brazil.

Ito na ang pangala­wang sunod na linggo na ang isang Pinoy ay umo­kupa ng podium sa isang torneo sa Taiwan.

Noong nakaraang ling­go lang, nakaakyat sa trono si Tony Lascuna sa 2019 Nan­bao TPGA Open (Philippine Tour 2) sa Tainan, Taiwan.

Hindi lang sina Lascu­na at Tabuena ang main­it ang hataw. Ilang araw pa lang ang nakalilipas, nag­pakawala si Daniella Uy ng apat na birdie at isang eagle tungo sa 4-under-par 68 sa huling round upang maiposte ang top 4 performance sa pagsasara ng malupit na 2019 Party Golfers Ladies Open sa National Golf Country Club ng Yuanli Township, Miao­lu County.

Sa kabuuan, pagkata­pos ng 3 rounds, nagsu­mite ang Pinay ng iskor na 212 (74-70-68) para mu­ling maram­daman ng host ang tikas ng Pilipi­nas. Anim na Taiwanese at isang Thai ang nakaupo sa unang apat na baytang na tumagal lang ng 54 holes.

Ang iba pang kinata­wan ng bansa ay hindi nakadikit sa centerstage. Si Pauline Del Rosario ay malayo sa front runners o maging sa top 20 dahil sa iskor na 219 habang si Chanelle Avaricious ay kumartada lang ng 222.

Dalawa pang Pinay, sina Cyna Rodriguez at Marvie Monsalve, ay na-eliminate dahil sa matam­lay na iskor.