Atty. Gadon, sinuspinde ng SC

Sinuspinde ng Su­preme Court (SC) ang anti-bobo crusader na si Atty. Larry Gadon. Sa resolusyon ng Supreme Court 2nd Di­vision na may petsang Hunyo 26, 2019, tatlong bu­wan na suspensiyon ang ipi­nataw laban kay Gadon.

Ang suspensiyon kay Gadon ay dahil sa paglabag sa 8.01, Canon 8 ng Code of Professional Responsibility na nagbabawal sa mga abo­gado sa paggamit ng mga mapang-abuso o offensive na lengguwahe sa kanyang pag-akto bilang abogado.

Naglabas din ang SC ng babala kay Gadon na kung uulit ito ay maaari syang pa­tawan ng mas mabigat na pa­rusa.

Nag-ugat ito sa disbar­ment case na inihain ng der­matologist na si Helen Jose­lina Mendoza laban kay Gadon noong 2009.

Tinawag umanong ‘very stupid’ ni Gadon ang mga liham ni Mendoza at sinabi pang aabutin ng 10 taon ang paghahain ng legal suit.

Para sa SC, mali ang gi­nawa ni Gadon dahil tinuya nito ang legal system.

“Atty. Gadon’s remarks about the slow justice system and insinuations that cases are won based on abun­dance of resources, tramp the integrity and dignity of the legal profession and the judicial system, and adverse­ly reflect on his fitness to prac­­tice law,” pahayag ng SC.

Giit naman ni Gadon, maghahain siya ng motion for reconsideration sa SC at hindi pa rin umano naipapa­tupad ang nasabing suspen­siyon.

“I will file an MR. It is not yet implemented. If it was implemented, then it has already lapsed,” pahayag ni Gadon.

Si Gadon ang matatan­daang nanguna sa impeach­ment case laban sa napatal­sik na si dating Chief Justice Ma. Lourdes Sereno.