Binanatan sa pork barrel, resbak ng mga cong.. Lacson at Drilon, sagabal sa mga plano ni P-Digong

Mga hadlang umano sa mga repormang nais ipatu­pad ni Pangulong Rodrigo Duterte ang ginagawang pagbatikos nang walang ba­sehan nina Senate Minority Leader Franklin Drilon at Senator Panfilo Lacson sa ipinasa ng Kamara na 2020 National Budget.

Ayon kay Deputy Spea­ker Henry Oaminal, may pa­nahon naman para kila­tisin ng Senado ang 2020 budget na ipinasa ng Ka­mara, kaya hindi umano dapat na mag­sabi ng kung anu-anong pa­hayag sina Lacson at Drilon na hindi naman nila kayang patu­nayan.

Aniya, ang General Ap­propriations Bill (GAB) na ipinasa ng Kamara ay tumu­tugon sa mga repormang gustong maipatupad ni Pa­ngulong Duterte kaya walang dapat ikabahala tungkol sa ‘pork’, ‘parking ng pondo’ o insertions sa budget.

Tinutukoy ni Oaminal ang naging pahayag nina Dri­lon at Lacson sa umano’y pagbabantay nila sa mga ma­anomalyang pagbabago na ginawa ng Kamara sa GAB para sa 2020 dahil sa pag­ka­karoon ng “small commit­tee” para tanggapin ang mga amendment sa panukalang ito.

Pinagtawanan naman ni Deputy Speaker Deogracias Victor Savellano ang sinabi ni Drilon sa umano’y pag­babantay nito laban sa ‘pork’ na maaaring isingit sa natio­nal budget dahil kung maalala noon ay may nagsampa pa umano ng kaso laban sa se­nador dahil sa sinasabing overpriced na Iloilo Con­vention Center kung saan ibinuhos umano ni Drilon ang P200 milyon ng kanyang Prio­rity Development As­sis­tance Fund (PDAF) noong 2013 para sa pagpapatayo nito.

Ayon kay Deputy Spea­ker Pablo John Garcia, wa­lang bago sa pagbubuo ng small committee para tala­kayin ang mga amendment sa national budget.

Tulad ng naipaliwanag na umano ni Albay Rep. Joey Salceda, senior vice-chair­person ng House Appro­pria­­tions Committee, ito ang na­ging tradisyon noon pa mang ika-8 Kongreso.

“Walang tinatago, wa­lang dinadagdag o binaba­was sa national budget. Ang tanging bilin sa amin ni Speaker Alan Peter Cayeta­no ay siguraduhing ang bud­get ay epektibong maka­katugon sa mga repormang ipinapatupad ng ating Pa­ngulong Digong,” sabi pa ni Garcia.