Tigers tinalo ang Athletics; Dubai Team, itinaob si Pacman

Pinalakas ng Davao Occidental Tigers ang laro kontra sa Batangas City Athletics at nagpakitang-gilas ng tikas sa Dubai.

Nagtala si Mark Yee ng ika-30 double-double habang si Billy Robles ang namuno sa scoring nang gibain ng Tigers ang Athletics, 67-57, noong Biyernes ng gabi sa unang MPBL International Game sa Hamdan Sports Complex.

Nang ipatas ni Robles sa 2-2, sinundan agad ni Yee ng go-ahead basket hanggang sa hindi na lumingon pa ang Tigers tungo sa ika-4 na straight win at itarak ang 14-2 record para sa South division ng 31-team Maharlika Pilipinas Basketball League Lakan Season.

Tumapos si Robles na may 14 puntos, habang si Yee ay may 16 puntos at 10 rebounds para sa Cocolife-backed Tigers, ang MPBL Datu Cup South champion na natalo sa National Finalist sa north division na San Juan Knights.

Samantala, nagmukhang hindi exhibition game ang laban ng Dubai DJ MC All Stars at ng Manny Pacquiao-led MPBL Executives.

Dahil mas umigting ang pakikipagkompetensiya ng Dubai laban sa team ni Pacman, 99-96, sa overtime game kung saan si Senador Pacquiao, CEO at founder ng MPBL ay pinasaya ang crowd nang tumipa siya ng 35 puntos, limang triples at daredevil drives.

Umiskor si dating pro Emmer Oreta, ang MPBL Operations Head, ng huling 5 puntos sa regulation kabilang na ang 3 puntos sa nalalabing 10.4 segundo para mapuwersa ang overtime play, 90-90.