Naglalaman ng pagpapahirap sa kanya sa hazing.. Sulat ni Dormitorio, inilabas ng pulisya

Inilabas na ng pu­lisya ang liham ni 4th Class Cadet Darwin Dormi­torio tungkol sa brutal na sinapit nito sa pamamagitan ng hazing mula sa kamay ng kan­­yang upperclass­men.

Napag-alaman kay Ba­guio City Police Office (BCPO) Chief Lt. Col. Allen Rae Co, may petsang Agos­to 21, 2019 ang liham na isi­nulat ni Dormitorio, isang bu­wan bago ito pumanaw.

Sa nabanggit na liham, idinetalye ni Dormitorio na sinaktan siya nina 3rd class Cadets Shalimar Imperial at Felix Lumbag at isang Ca­det Manalo dahil sa paggasta niya sa kanyang allowance.

Inatasan umano siyang magsagawa ng “pumping exercises” at “bridge under bunks” at nakaranas din siya ng pananakit mula sa mga kadete.

Nakasaad sa sulat na ilang beses siyang nahulog at bumagsak sa sahig.

Galit na galit umano si Cadet Lumbag kaya pina­ta­as ang kanyang kamay at ilang beses siyang sinuntok sa kanyang katawan, parti­u­lar sa bahagi ng dibdib nito.

Naospital si Dormitorio matapos ang isinagawang hazing sa kanya.

Sina Imperial at Lum­bag ay kapwa na-dismissed na dahil sa partisipasyon sa ha­zing kasama ang nag-udyok na si Cadet 1st Class Axl Rey Sanupao.

Samantala, umabot na sa anim ang mga suspek sa pag­kamatay ni Dormitorio.

Hindi muna pinangala­nan ang pinakahuling nadag­dag sa listahan na isa uma­nong 2nd class cadet.

Ang ikaanim na suspek umano ang pinakahuling na­nakit sa 20-anyos na kadete bago itinakbo sa ospital noong Setyembre 17. Sinipa umano nito si Dormitorio nang makita niyang nakahiga sa kanyang kama ang bik­tima.