Roster ng GILAS para sa SEAG, binuo na ni Cone

Pinangalanan kahapon ni Gilas coach Tim Cone ang 15-man pool na pagpipilian na maglaro para sa 30th Southeast Asian Games.

Anim na miyembro mula sa Barangay Ginebra, apat mula sa San Miguel, tatlo mula sa TNT, at tig-isa mula sa Alaska at Phoenix Pulse ang bubuo sa pool na kakatawanin ang Pilipinas sa SEA Games na gaganapin sa bansa sa Disyempre.

Napili ni Cone ang kanyang sariling mga manlalaro sa PBA na si LA Tenorio, Stanley Pringle, Scottie Thompson, Greg Slaughter, Japeth Aguilar, Art Dela Cruz, habang si June Mar Fajardo, Christian Standhardinger, Marcio Lassiter at Chris Ross ang galing sa San Miguel.

Nakasama rin sa pool ang mga manlalaro mula sa TNT na si Jayson Castro, Troy Rosario at Roger Pogoy, habang napili rin si Vic Manuel ng Alaska at Matthew Wright ng Phoenix Pulse.

Planong simulan ang preparasyon para sa SEA Games sa Lunes. “With limited practice, we don’t have a whole lot of time to teach, time to try out and get a lot of the guys in, figure out who’s gonna be it. We don’t have time for that,” saad ni Cone matapos ang PBA board meeting na ginanap sa opisina ng liga kahapon sa Libis, Quezon City.

Isa sa mga magiging mahigpit na kalaban ng Gilas Pilipinas para sa SEA Games ang Indonesia na kinuha bilang head coach si Rajko Toroman at naturalized player si Denzel Bowles.

Matatandaang nag-coach si Toroman sa orihinal na Smart Gilas habang si Bowles ay naging import na sa Pilipinas. Samantala, pinangalanan din ang pool na maglalaro sa 3x3 basketball. Ang mga napili ay sina CJ Perez, Robert Bolick, Terrence Romeo, Anthony Semerad, Chris Newsome, Ian Sangalang, Mac Belo, Chris Banchero, Raymond Almazan, Jason Perkins, Mo Tautuaa at Baser Amer.