Trike driver pinagbabaril, dedo

Patay makaraang pagbabarilin ang isang tricycle driver sa Quezon City, kahapon ng madaling-araw.

Kinilala ang biktima na si Erwin Villamor, 38-anyos.

Ayon sa paunang imbestigasyon, pinuntirya ang biktima habang sakay ng kanyang minamanehong traysikel. Bumangga pa ang kanyang sasakyan sa nakaparadang kotse matapos barilin.

Narinig umano ng mga residente ang dalawang putok ng baril at matapos nito ay nakita nang nakabulagta sa kalsada si Villamor.

Samantala, itinanggi naman ng kinakasama ni Villamor na may kaaway ang biktima at wala rin umano itong naikukuwentong may pagbabanta sa kanyang buhay.