Buwayang BGY. officials, extended ang pagiging korup
MALING ALISAN NG ‘K’ ANG MAMAMAYAN NA MAKAPAMILI NG MANUNUNGKULAN SA KANILANG BARANGAY —Sa ngayon ay may 11 senador na ang pumabor na ipagpaliban ang May 2020 Barangay at SK Elections at gawin na lamang sa May 2023.
Malamang, ang mga bumoto sa mga senador na ito ay nagsisisi na kung bakit nila iniluklok sa poder ang mga senador na sila palang mag-aalis ng kanilang karapatang makapili ng mga nais nilang manungkulan sa kanilang mga barangay, boom!
◘◘◘
PATI ANG MGA ‘BUWAYANG’ BGY. OFFICIALS AY MAKIKINABANG DIN SA POSTPONEMENT NG BGY. AT SK ELECTIONS — Sakaling aprubahan ng mayoryang senador at lagdaan ni P-Duterte ang postponement ng Barangay at SK Elections, hindi lang ang mga matitinong Barangay at SK officials ang makikinabang dito kundi pati ang mga “buwayang” barangay officials.
Mantakin ninyo, dahil sa postponement, ang mga barangay officials na sangkot sa illegal drugs at korupsiyon na isinusuka na ng kanilang mga ka-barangay ay mamamayagpag pa rin sa poder hanggang 2023, susmaryosep!
◘◘◘
MATAPOS PALAYAIN ANG MGA PRESONG CHINESE DRUG LORDS, SANGKATERBANG SHABU ANG LUMAGANAP!—Sangkaterbang shabu ang nakumpiska ng tropa ni NCRPO Director Maj. Gen. Guillermo Eleazar sa Quezon City na umabot sa halagang P27.2 milyon at sa Pasig City na P240 milyon.
Palayain ba naman ni ex-BuCor Chief Nicanor Faeldon ang mga Chinese drug lords gamit ang Good Conduct Time Allowance (GCTA) Law, aba, natural lalaganap ang illegal drugs sa bansa, buwisit!
◘◘◘
‘PARAS PARAK’ NA PROTEKTOR NG MGA ILEGALISTA SA PARAÑAQUE, SIBAKIN!—Isang pulis na kilala sa tawag na “Parak” ang hindi naman nakadestino sa Parañaque City Police Station, pero ang halos buong oras nito ay iginugugol sa “lungga” ng mga ilegalista sa lungsod na ito.
Ang dapat sa ganitong uri ng pulis ay sinisibak sa serbisyo kasi imbes na gugulin ang sarili sa paglilingkod kung saan siya nakadestino, eh, dumarayo lang sa ibang lugar para magbigay-proteksiyon sa mga ilegalista, pwe!
Comments