Sibol E-Sports Team, binuo para sa pagsabak sa SEAG

Malulupit na diskarte at team work ang ipamamalas ng 27 atletang napili bilang koponan ng E-Sports national team SIBOL na sasabak sa 30th edisyon ng Southeast Asian Games sa Nob 30-Dis. 11, 2019 sa bansa.

Ibabandera ng National Team ang kanilang husay sa online gaming sa anim na events kabilang ang Dota 2, Star Craft II, Hearthstone, Arena of Valor, Mobile Legends: Bang Bang at Tekken 7 para makuha ang inaasam na 6 na gintong medalya. Sa unang pagkakataon ay mapapabilang ang E- Sports sa biennial meet na magsisimula sa Dis. 6-10 sa Fil-Oil Flying V Centre sa San Juan City kung saan unang nasaksihan ito bilang demonstration sport sa 2018 Asian Games sa Jakarta, Indonesia.

Ang pinal na listahan ng mga manlalarong lalahok sa SEAG ay sina Angelo Kyle “Pheww” Arcangel, Karl Gabriel “KarlTzy” Nepomuceno, Kenneth Jiane “Kenji” Villa, Carlito “Ribo” Jr., Jason Rafael “Jay” Torculas, Jeniel “Haze” Bata-Anon at Allan Sancio “Lusty” Castromayor para sa Mobile Legends: Bang Bang Team. Babalasahin nina Jacinta “Jia” Dee at Dustin “WaningMoon” Mangulabnan ang diskarte sa Hearthstone Team. Team work at game play ang ipamamalas ng grupo ng Dota 2 Team nina Marvin Salvador “Boomy” Rushton, John Anthony “Natsumi” Vargas, Bryle Jacob “cml” Alvizo, Jun “Bok” Kanehara, Mc Nicholson “Mac” Villanueva, James “Erice” Guerra at “Van” Jerico Manalaysay, gayundin sina Kevin Kio “Gambit” Dizon, Jeremiah “1717” Camarillo, Miguel Klarenz “Miggie” Banaag, Jevan Lorenzo “Bents” Delos Santos, Lawrence Anthony “Rubixx” Gatmaitan, Bradie Ryan “Yatz” Velasquez at Kyle Jepherson “Vindicated” Padlan para sa AoV Team.

Bubuo sa team ng SIBOL Tekken 7 sina Andreij Hosea “Doujin” Albar at Alexandre Gabrielle “AK” Laverez habang ang tambalan nina Caviar “EnDerr” Acampado at Justin “Nuks” Santos ang sasalang sa Starcraft II Team.