Dapat gawin ng Titser na sinuspinde ang lisensiya

Dr. Persida V. Rueda-Acosta / Magtanong Kay Attorney

Dear Chief Acosta, Sinuspinde ng Board for Professional Teachers ang aking lisensiya bilang guro. Dahil dito, hindi ako makabalik sa pribadong paaralan kung saan ako nagtatrabaho. Saan ko ba puwedeng iapela ang kanilang desisyon? — May

Dear May, Para sa iyong kaalaman, ang batas na nakasasaklaw sa iyong katanungan ay ang Republic Act (R.A.) No. 7836 o mas kilala sa tawag na Philippine Teachers Professionalism Act of 1994. Nakasaad sa Section 23 na:

“Section 23. Revocation of the Certificate of Registration, Suspension from the Practice of the Teaching profession, and Cancellation of Temporary or Special Permit.

x x x

The decision of the Board to revoke or suspend a certificate may be appealed to the regional court of the place where the Board holds office within fifteen (15) days from receipt of the said decision or of the denial of the motion for reconsideration filed in due time.” (Binigyang-diin)

Ayon sa nasabing batas, maaari mong iapela ang pagkasuspinde ng iyong lisensiya sa Regional Trial Court (RTC) sa lugar kung saan matatagpuan ang opisina ng nasabing Board.

Ito ay maaari lamang ninyong gawin sa loob ng 15 araw mula nang matanggap ninyo ang kanilang desisyon o ang denial ng inyong Motion for Reconsideration.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.