Phl Blu Girls, tiwalang may tsansa sa Olympics

Pagtala sa kasaysayan ang pakay ng Philippine Blu Girls kung saan positibo ang tsansa ng soft ball team na makalaro sa 2020 Tokyo Olympics.

“May awa po ang Diyos at mapagtatagumpayan namin ito. Tiwala lang po at think positive. Hinihingi po namin ang suporta ng sambayanan,” pahayag ni coach Anna Santiago, markadong player ng PHL Team at itinuturing na winningest coach sa sports matapos maihatid ang Adamson Lady Falcons sa 73 sunod na panalo sa UAAP. “Actually, naputol na po ‘yung winning streak namin,” aniya sa kanyang pagbisita sa ‘Usapang Sports’ ng Tabloids Organization in Philippine Sports (TOPS) kahapon sa National Press Club sa Intramuros, Manila.

Sa suporta at pangangasiwa ni Jean Henri Lhuillier, muling umariba ang Blu Girls sa international scene at puspusan ang paghahanda para sa WBSC Asia/Oceania Qualifying tournament – huling tsansa ng Blu Girls para makasikwat ng Olympic slots para sa 2020 Tokyo Games sa Setyembre 24-29 sa Shanghai, China. “Target po naming manalo rito. Kung papalarin kami po ang kauna-unahang team sports sa Pilipinas na makalalaro sa Olympics. Malaki po ang tsansa natin dahil natalo na po natin sa Asian tournament at makakalaban namin dito,” pahayag ni Santiago. (MC)