Dagdag-buwis, kina-career ng kampo ni Speaker Cayetano

Ka Ambo / Bistado

NANG hindi payagang “dyuminggel” ang isang bakla sa CR na pangbebot, nagulo ang Kongreso, pero ngayong papatawan ng buwis ang sigarilyo at alak, bakit tameme sila sa mga lasenggo’t yosi-kadiri?

Mas pinakinggan ang putak ng bakla kaysa sa iyak ng senglot.

He-he-he!

◘◘◘

ISASABAY din dito ang panukalang-batas sa PIFITA.

Hindi ‘fefita falayfay' kundi PIFITA as in “Passive Income and Financial Intermediary Taxation Act”.

Hindi buwisit na bakla kundi ang buwisit na buwis!

◘◘◘

NAKAHANDA ang grupo ni Speaker Alan Peter Cayetano na idepensa ang PIFITA upang magkaroon ng dagdag-buwis na siyang prayoridad ng Duterte administration.

Ka-tandem nito ang FIA, ang “Amendments on Foreign Investments” na hihigop sa mga investors na magnegosyo sa ‘Pinas!

◘◘◘

KASIMBILIS ni Cardo Dalisay sa telenobelang “Ang Probinsyano” ang pagbunot ng boga ng mga kongresista kasi tiyak na mamadaliin ang pagpapatibay ng mga naturang batas.

Kaliwa’t kanan ang committee hearing sa Kamara na parang naghahabulan sa Tour of Luzon!

◘◘◘

AYON sa chairman ng House Committee on Ways and Means na si Rep. Joey Salceda, aamyendahan ang National Internal Revenue Code of 1997.

Ito na mismo ang Fourth Package ng Comprehensive Tax Reform Program ng Duterte administration!

◘◘◘

SINABI naman ng awtor ng FIA bill na si Rep. Victor Yap na papayagan na ang mga dayuhan na mag-practice ng kanilang propesyon sa Pilipinas.

Hindi lang sila magnenegosyo, maghahanap­buhay pa sila sa ‘Pinas!

◘◘◘

INAAPURA ni Speaker Cayetano ang pagpapatibay ng mga priority bills ni P-Digong dahil 15 buwan na lang siyang magiging Speaker.

“Sana, ako’y maging karapat-dapat at sana, ay tulungan n’yo ako sa loob ng 15 buwan,” pakiusap ni Speaker Cayetano!

◘◘◘

NAGKATOTOO ang analisa ni Institute for Political and Electoral Reform Executive Director Ramon Casiple sa pagsasabing “big boost” ang bagong Speaker sa 18th Congress.

Ito ay makukumpirma kapag napagtibay ngayong Oktubre ang 2020 National Budget na halos paniwalaan-dili sa kasaysayan ng Kongreso!